Kato nga mga adlaw, duro gid nga mga kamal-aman nga nagapati nga may isara ka kaharian dya sa Barbaza nga ginapangunahan kang sangka makagagahum nga datu. Ang datu nga dya may isara ka matahum kag mapinalanggaon nga bata nga babaye. Dya nga babaye ginatawag nga Binukot hay ginakurong tana kanga nag tatay sa andang balay, tanda kang pagprotekta kana. Pero bisan amu ra ang sitwasyon kang binukot, bantog guid tana sa andang lugar kag duro guid ang nakabati kun ano guid tana ka gwapa. Duro ang mga naga gwa nga istorya nahanungod sa amu nga bayi, asta nga nakalab-ot ang amu dya nga dya nga balita sangka maisog kag mapainubuson nga prinsipe kang bulan nadumdom gid tana kun tuod gid man bala ang ginahambal kang mga tawo. Nag-abot ang tiempo nga nagdesisyon ang Datu nga oras don nga ipakasal ang ana nga bata. Pero sa isa ka kundisyon, kun sin-o man ang makatugro kang pinakaduro nga manggad sa andang kaharian, amu ra ang angay gid nga paakaslan kang ana nga bata. Kang naman-an kang Prinsipe kang bulan nang plano kang Datu, nagdali-dali gid tana nga nagpanaog sa anang trono dara ang tanan na nga mga manggad nga igatugro sa Datu. Kag nagsugtanay tanda nga kada magbilog ang bulan maga kitaay ang prinsipe kang bulan kag ang daraga sa sangka espesyal nga lugar kun sa diin ang langit kag lupa naga tabuay. Ang dya nga lugar ginatawag nga Abat- abat kun sa diin tanda darwa maga kit-anay. Ang pagtunog kang budyong maga patimaan nga magakit-anay ron ang darwa ka magnobyuhanay. Sa anda pirme nga pagkit-anay, nahulog gid ang buot kang daraga sa prinsipe kang bulan.
Naga kasari-sari nga mga bulak ang ginahulog pirme kang prinsipe sa anang pinalangga nga sa kabuhayan nahimo nga mga corales sa dagat. Sa pagligad kang mga binulan, ang daraga handa na gid sa pagbaton sa Prinsipe nga mangin ana bana. Sa pag-abot kang bilog nga bulan nalipay gid ang babaye kay magakit-anay liwat tanda kang Prinsipe. Sang nagaturok ang babaye sa bintana nagtingala gid tana sa anang nabatyagan. Tam-an gid kahipos ang gabi-i, hinale lang nakita nya ang baybay nga nagataas ang balod kag nagaparapit kananda. Asta nga ginlamon kang pagka bahol-bahol nga balod ang kaharian kang Datu. Kag sa pagbilin kang tubig sa lupa, nakita kang prinsipe ang nagkaramatay nga tawo, isa ron didto ang Datu. Gin kulbaan gid ang Prinsipe asta nakita na ang iba pa nga nakasalbar sa amo to nga hitabo. Nagtunog ang budyong pero wara nag-abot ang ana nga ginahulat. Sa amo to nga hitabo, ang Prinsipe nag promisa sa ana kaugalingon ana gid paga bantayan ang lugar kun sa diin tanda nagakit-any kang ana pinalangga, nga inde ron gid magliwat ang natabo nga trahedya. Pero asta kadya ang paminsaron kag tagipusoon kang Prinsipe natalana gid lamang para sa daraga. Halin kato, wara ron gid nakita ang babaye. Duro ang naghambal nga tana napatay, pero nagapati ang Prinsipe nga tana buhi pa.
Sa kadya nga tiempo Makita man gihapon naton ang pagpalangga kang Prinsipe kang bulan. Kada magbilog ang bulan, Makita naton ang Abat-abat nga naga gwa sa tunga kang kadagatan. Naga pakita lamang nga asta kadya, ginahulat man gihapon kang Prinsipe ang anang pinalangga nga daraga. Makit-anay man bala tanda sa aton nga Batabat?
No comments:
Post a Comment